Ингушская литература

Описание

Хетаргахьа, цхьаккха саг хургвац наьна мотт ца безаш а ца бувцаш а. Хьалха д1аихача хана, ц1ена, хоза бийца к1оарга ма1ан дола, вайна х1аранена боча хила беза наьна мотт дуккханешта тахан бицбеннаб, ийрчабаьккхаб, эрсий меттаца эбеш бувцаш хоз из дукхаг1болча кагийча а боккхийча наха. «Тхона ха-м хац г1алг1ай мотт бувца, хой а сенна беза из», - оалаш а хоз хийла. Цул совг1а, дукха нийслу, дукхаг1йола вай меттара оазаш ала езача бесса д1аала цаховш бараш а. Цу дерригане толхабу г1алг1ай мотт, ийрчабоакх, из бувцаш бола г1алг1ай а к1езиглу. Дегчу дувшаш да г1алг1ай мотт къе ба аьнна хетачарга уйла яйта ц1ихезача поэто Хамхоев Ахьмада аьнна дешаш а: …Эггара хьалха сай наьнага Со хьо бувцаш йистхиннав, Бера хана 1а нахага Со харц ца ле 1омаваьв… Х1аьта вай оалаш ма дий: хозача дешо лакха лоам бошабаьб. Укх дешашца поэто хьахьокх цун к1оарга ма1ан: …К1аьда, хьаьнала из бецаре Вай мотт хьанна эшаргбар? Меттахь оалаш уж децаре Дешаш сенна эшаргдар?.. Т1аккха, бувца воай наьна мотт шаьра а хоза а.